PM-in Arunachal Pradesh leh Tripura tlawh dawn

Prime minister Narendra Modi chuan vawiin, September 22 hian Arunachal Pradesh leh Tripura a tlawh dawn a, hamsawnna hna thawh tur project hrang hrang a hawng ang.

Prime Minister hian Arunachal Pradesh khawpui, Itanagar-ah Rs vbc 5,100 hu hmasawnna project hrang hrang thawhna tur lungphum a phum dawn a, chung zingah chuan hydropower project Rs vbc 3,700 chuang senna tur pawh a tel tih Prime Minister Office (PMO) chuan a tarlang.

Modi hian energy lama hmalakna bakah, Tawang-a state-of-the-art Convention Center, ft 9,820 aia sang chu a hawng bawk dawn. He conference center hi international conference, cultural festival leh exhibition-te hmanna tura duan niin, mi 1,500 chuang len theihna tur bakah tourism tihchakna tur leh, helai biala hnam ziarang chawikanna tur kalpui a ni ang.

Prime Minister hian intlawhpawhna, healthcare, kangmei laka himna, hmeichhe hnathawkte awmna tur, Rs vbc 1,290 vela ruahman pawh a hawng dawn bawk a ni. Official-te chuan heng hmalaknate hian economy ṭhanlenna, khawsak phung chawikan leh intlawhpawhna a ti changtlang dawn tih an sawi.Tualchhung eizawnna ecosystem tihchakna atan Modi chuan tax petu, sumdawng leh industry aiawhte chu GST chungchang a sawipui dawn a, state-a eizawnna kalpui dan tur ṭha zawk an sawi ho bawk ang.

Hemi hnu hian Prime Minister chuan Tripura-ah Mata Tripura Sundari Temple Complex, Matabari-a PRASAD scheme hnuaia sak pawh a hawng dawn a ni. He project hmang hian kawng thar siamna bakah luhka leh daidanna thawmṭhat, tuiluan kawr siamṭhat leh mikhual thlenna tur chhawng thuma sang, meditation hall leh office-te sak a ni ang.