Nagaland : Sorkarin zirtirtu nawrh huaihawtte an hna chhunzawm turin ngen

Nagaland school education advisor Kekhrielhoulie Yhome chuan, Zirtawpni khan RMSA-2016 zirtirtuten an service-a dah ngheh phuta ni 10 chhung nawrh an huaihawt tawh avangin an hna chhunzawm leh turin a ngen. State khawpui Kohima-a press conference neihah, Yhome chuan sorkar sikula zirlai naupang zirtirtu nei loa an awm chuan a rilru a tih hrehawm thu a sawi.

Zirlai naupangte chu zirtirtu nei loin hunrei tak an awm tawh a, heng zirlaite hi khawtlanga mi hnuaihnung leh rethei zawkte an nih avangin an zirna in nasa takin a tuar dawn tih a sawi a, zirtirtute chu court thutlukna ngaichang turin a ngen a ni. Yhome chuan sorkarin committee a din chu chipchiar taka zirchiang a, a chinfel dan tur rawtna siam tura tih a nih avangin, zirtirtute telin emaw tel lo emaw pawhin kalpui zel a ni dawn tih a sawi.

Zirtirtu lungawi lohna lantir mek mi 367 te chu central scheme hnuaiah contract-a thawk tura ruat an nih thu sawiin, he scheme hnuaiah hian zirtirtu 5,058 an awm a, an zingah hian RMSA-2026 batch chiahin court-ah lungawi lohna an thlen tih a tarlang. Zirtirtu dangin thlatin hlawh atan Rs 25,000 an lak laiin, lungawi lohna lantir mekte chuan Rs 31,315 an la tih a sawi. An thil phut ber chu Nagaland sorkar hnuaia a ngheta awm a ni tih a sawilang bawk.