Meghalaya : Sakhaw hruaitute ruihhlo leh HIV-AIDS chungchang ngaihven turin chah

Meghalaya governor CH Vijayashankar chuan sakhaw hruaitute chu state chhunga ruihhlo hman sual, HIV-AIDS, Tuberculosis (TB) leh cancer natnain ṭhalai nunah nghawng pawi tak a nei mek chu ngaihven turin a chah.

Central Puja Committee (CPC) buatsaiha All Faith-All Religion 'Get-Together of Harmony' vawi 32-na neiha thu a sawiah, Governor chuan ṭhalai zinga ruihhlo hman sual, tuberculosis (TB), HIV leh cancer natna hluar zel chuan khawtlangah nasa takin harsatna a thlen tih sawiin, ṭhalai TB vei zingah HIV-AIDS vei an tam tih a sawi bawk.

Sakhaw hrang hrang hruaitu, civil society pawl leh khawtlang hruaitute chu sorkar nen thawh hona ṭha tak neia inzirtirna neih a, heng natna laka invenhimna tihchak leh harsatna tawk mekten a hun taka enkawlna an dawn theihna tura hma lak a ṭul tih a sawi. An state hma hun tana mi pawimawh, ṭhalaite chu chu heng natna aṭanga an fihlim theihna turin kaihhruaina ṭha an dawn a ṭul a ni, a ti.

Governor chuan CPC-in khuarel chhiatna, mi retheite tana damdawi lam inenkawlna leh Covid-19 hripui len laia an lo thawh hlawknate sawi langin, kum 1992-a din a nih aṭanga an hna tlin taka an thawhnaah a fak. CPC chu Meghalaya-ah vantlang tan thawktu ṭha tak, remna leh muanna thlentu an nih thu a sawilang bawk.