Manipur : Governor-in high-level security meeting ko

Manipur governor Ajay Kumar Bhalla chuan September 19-a Assam Rifle-te beih an nih avanga mi pahnih an thih bakah mi dang pangain silai kahna hliam an tuar hnuah, Zirtawpni tlai khan Raj Bhavan-ah high-level security meeting koin, state chhunga venhimna kalpui dan ennawn a ni. Assam Rifle-ten beih an tawh chungchangah hian police-te chuan mi pahnih an man tawh.

Meeting-ah hian Chief Secretary, Security Advisor, military commander-te leh central leh state police force-te an tel. Official-te chuan inbeihna thlengah hian 33 Assam Rifle sipai pahnih - Nb. Sub. Shyam Gurung leh Rfn. Ranjit Singh Kashyapan-ten nunna an chan a, mi dang panga chu silaia kah hliam an ni tih an sawi. Meeting-ah hian highway, transit route, leh border zone-a hmun ralṭi leh derthawng zual laiah venhimna tihchak a pawimawh thu an sawi.

Governor-in pawikhawihna thlen belh zel tur venna atan patrolling neih a pawimawh thu sawiin, mipui himna turin phai leh tlangram district-ah te fimkhur taka dan leh thupek kenkawh reng a ṭul tih a sawi. Hemi hnu hian Governor Bhalla chuan Mantripukhri-a IG Assam Rifles (S) Headquarters tlawhin, sipai martarte zahna lantirin, an ruang chungah pangpar a dah bawk a ni.