NE venhimna chungchangah meeting nei Rajnath-a'n NE-a Armed Force tihtlem duh

Union Home Minister Rajnath Singh chuan kar kalta Inrinni khan Guwahati-ah hmarchhak state pariat Chief Minister te chu venhimna chung­changah meeting a neihpui.

Rajnath Singh chuan hmarchhak biala venhimna chu a ngaih pawimawh thu sawiin venhimna dinhmun ennawntu atan Joint Intelligence Committee chairman R.N. Ravi kaihhruaina hnuai­ah committee din a ni, a ti a, report a thehluh thuai a beisei thu a sawi bawk.

Meeting zawha press conference a neihah Home Minister Singh chuan hmarchhak biala helte nena remna zawnga inbiakna an neih mek chu kawng dikah a kal zel thu sawiin, pawikhawihtu helte chungah sorkar laipuiin dawhtheihna lantir a tum loh thu a sawi.

"Tlanna sum phuta inrukbona leh hel pawl tenaute pawikhawihna chu Assam leh Meghalaya-ah a hluar hle a, sorkar laipui chuan heng hel pawlte hi inbiakna a neihpui lo ang a, mahse khauh takin an chungah action a la zel ang," a ti.

Hmarchhak state Chief Minister te chuan pawikhawihtu helte chhuitu atan an state-ah ṭheuh special investigation cell an siam a pawimawh thu a sawi bawk.

Helpawl ṭhenkhat nena remna zawnga inbiakna an kalpui mek chung­changah hun bithliah siam a, a tahtawla inbiakna kalpui dan tur an ngaihtuah mek thu leh inbiakna chu chinfel thuai a nih tur thu a sawi bawk.

Union Home Minister Singh chuan hmarchhak state ṭhenkhata Armed Forces Special Powers Act (AFSPA) lekkawh mek chu ennawn an tum loh thu a sawi bawk a, hmarchhak biala sorkar laka helna chu a tlahniam mek zel a ni, a ti.

Hmarchhak helte'n awlsam zawka ralthuam leh silai an nei ṭhin chu a ngaihmawh thu sawiin Chief Minister te chu a dapchhuah beihpui thlak ṭheuh turin a ngen bawk.

Singh chuan hmarchhak biala Central Armed Forces (CAF) tam lutuk chu a ngaimawh thu a sawi bawk a, Chief Minister te chu an state-a Armed Force an mamawh dan zirchiang tur leh an mamawh ang zela pek ṭha a tih thu a sawi.

"Venhimna dinhmun tichhe chuang loin hmarchhak biala CAF tam lutuk chu tihtlem a ngai a, hei hi pawn lam mite'n a dik zawnga hmarchhak bial an hmelhriatna atan pawh a ṭangkai a ni," a ti.

Mizoram leh Tripura bakah Assam, Meghalaya leh Arunachal Pradesh ram zau zawkah chuan sorkar laka helna a bo ṭep tawh a, hetihlai hian Nagaland leh Manipur mipuite pawhin nasa takin remna leh muanna siam an duh a ni, tiin Singh chuan a sawi bawk.

Meeting-ah hian Nagaland Chief Minister T.R. Zeliang chuan sorkar laipui leh Nationalist Socialist Council of Nagaland- Khaplang (NSCN-K) helte nena inkahhai thuthlung an chhunzawm theih nan helte be nawn leh turin a ngen bawk.

"Intelligence te thu dawnna chuan NSCN (K) te hian pawikhawihna tam zawk thlen an tum niin a lang a, state sorkar chuan theihtawp chhuahin hei hi dan a tum a ni. Hei vang hian sorkar laipui pawh inkahhai thuthlung chhunzawm a nih theih nan theihtawp chhuaha helte be leh turin ka ngen a ni," tiin Zeliang chuan a sawi.

Nagaland Chief Minister chuan NSCN (K) te'n inkahhai thuthlung an tihtawp chungchanga sorkar laipui nen inbiakna an neih chu state sorkarin a hriatpui loh thu sawiin, state sorkar thurawn lak ni se chuan inkahhai thuthlung ziahtir leh tura Naga NGO te nena ṭangruala theihtawp a chhuah tur thu a sawi bawk.