Imphal-ah curfew thlahdul JCILPS-in zirlai ruang an la duh lo

Leilung fate humhalhna atana inner line permit (ILP) system kalpui phûta lungawi lohna lantirtu, Joint Committee on Inner Line Permit System (JCILPS) activist te avanga sorkarin tiam chin awm loa cur­few a puan chu kar kalta Inrin­ni khan darkar nga thlahdul a ni.

Imphal East leh Imphal West district-ah chuan curfew thlahduh chhung hian chakkhai lamin mipui chhuak an tam hle a, hei vang hian traffic a jam phah nasa hle.

JCILPS chuan state sorkarin Manipur Regulation of Visitors, Tenants and Migrant Workers Bill 2015 a pass chu Assembly session neih meka ṭhiah a phut bakah pemlutte lak aṭanga leilung fate humhalhna tur dan khauh zawk siam a phut a ni. Kar kalta khan JCILPS activist te chuan Assembly house panin vawi eng maw zat kawng an zawh a, police te nen an innawrnaah July 8 khan zirlai pakhatin a thih phah a, midang 20 chuangin hliam an tuar.

Mitthi hi Ananda Singh Higher Secondary Academy-a pawl 11 zirlai, Ro­binhood Singh a ni a, JNIMS mor­gue-a la dah niin, JCILPS chuan state sorkarin bill thar a pass hma chuan a ruang hlawm a tum loh thu a tarlang.

Hetihlai hian Chief Minister Ibobi Singh chuan kar kalta khan Migrant Workers Bill chu ṭhiah a, bill thar buat­saihna atan hun a inhawn thu a sawi.

JCILPS te thil phut chu Manipur mipui, NGO, MLA leh pawl hrang hrang­te duhdan leh ṭhattlanna tur a ni, tiin Ibobi chuan migrant worker bill chu President pawmpui atan Governor kuta a awm thu a sawi. Bill hi President-in a pawmpui hnuah Union Law Ministry-a thawn leh tur a ni a, chumi hnuah MHA-a thawn leh a ni ang a, a ṭul chuan Union Cabinet-in a ngaihtuah leh a ngai a ni, a ti a, hei vang hian pawm emaw hnawl a nih leh nih loh tur a chian loh thu a sawi. Mahse state sorkarin bill a pass chu pawm a nih leh nih loh thla ruk chhunga tihchian ngei ngei tur a ni.

Manipur Chief Minister chuan sorkar JCILPS nena inbe turin a inhawn thu a sawi bawk a, tiam chin awm loa sorkarin curfew a puan chu a dinhmun azirin a tahtawla hlih a nih tur thu a sawi bawk.

Chief Minister Ibobi chuan kar kalta Inrinnia Guwahati-a meeting-ah Manipur-a inner line permit system kalpui a duh thu Union Home Minister Rajnath Singh hmaah a sawi bawk.

"Leilung fate humhalh nan ILP system emaw a tlukpui dan siam phutna nasa tak kan hmachhawn mek a, hetianga phutna hi Meghalaya-ah pawh a awm a ni. ILP system hi Mizoram, Nagaland leh Arunachal Pradesh-ah kalpui a ni mek bawk a, hei vang hian sorkar laipui chuan hmarchhak state te tan a thara ILP system a siam thei lo a nih chuan a tlukpui dan inang tlang takin a buatsaih a ngai a ni," a ti.