NE telecom infrastructure project kalpui dawn

Union Minister for Telecom­munications Ravi Shankar Pra­sad chuan hmarchhak biala telecom infrastructure tihchangtlun nan sorkar laipuiin cheng vaibelchhe 5,000 hu project a ruahman thu a sawi.

Union Minister Prasad hian kar kalta Inrinni khan Bangladesh, Cox Bazar-a international internet gateway aṭanga Tripura-a internet chak zawk, submarine cable thlunzawmna tur lung a phum.

Telecom infrastructure pro­ject chu kum nga chhunga kal­pui tur a ni tih sawiin, inter­national internet gateway chu a taka hman theih a nih chuan hmarchhak biala India ram state dangte anga internet connectivity changtlung zawk a neih tur thu a sawi. Internet chak chuan hmarchhak biala economy, education, tourism, banking leh service dangah hmasawnna a thlen tur thu a sawi bawk.

Prasad chuan Prime Minister Narendra Modi-a'n July 1-a Digital India programme a tlangzarh chu India ram thlak danglamtu tur a ni, a ti.

"India-ah hian mobile phone hmangtu vaibelchhe 98 leh internet connection vaibelchhe 30 a awm mek a, tun aṭanga kum hnihah internet connection hi vaibelchhe 50-a tihpun kan tum a ni," a ti.

"Mi vaibelchhe 82 chuang chu Aadhaar-ah an inziak lut tawh a, an digital record chu an kut hmawrah a awm vek tawh a ni. India rampuma village council 250,000 chu internet nena thlunzawm tawh an ni," tiin a sawi bawk.

Digital India programme hnuaia ruahmanna:

Sum ruahman zat Rs vbc nuai 4.5

Hna siam beisei zat nuai 18

Wi-Fi hotspot siam tum zat 2,500

Electronic bungrua siamnaah mi vbc 2-in hna an hmuh beisei a ni bawk.