Manipur : RIMS doctor-ten nawrh huaihawt

Manipur-a Regional Institute of Medical Sciences (RIMS), Imphal-a senior doctor pakhat beih a nih duh loh lantirin nimin khan Teachers’ and Medical Officers’ Association (TAMOA), RIMS chuan nawrh an huaihawt a, damlo eng emaw zatin healthcare service-ah harsatna an tawk.

Nawrh hi damdawi-ina damlo pahnih thihna thleng vanga mipui lungawi loin doctor kut thlak a, damdawi-in hmanruate an suasam vanga huaihawt an ni. Inrinni zan khan damlo pakhat, Imphal East ami chu damdawi-in aṭanga chhuahtir a nih hnu lawkah a thi a, a hnu rei vak loah hmeichhe pakhat chu damdawi-inah hian nau chungah a thi ve leh bawk a ni. Mitthi pahnih chhungte hi an lungawi lo a, damdawi-inah kal khawmin pawi an khawih zui ta a ni.

Nawrh huaihawt vang hian damdawi-ina service zawng zawng tihtawp a ni a, outpatient department (OPD), emergency care, routine operations (OT), leh periodic medical examination (PME) te pawh khar an ni bawk.

TAMOA chuan pawikhawihtute man chhuak a, hremna pe turin an phut. Hei bakah healthcare professional-te tan hnathawhna hmun him zawk siam an phut bawk. Service tihtawp ni mah se damlo, damdawi-ina awm mekte chu doctor-ten an enkawl chhunzawm tih sawiin, pawikhawihtute lakah FIR theh luh an tum tih an tarlang.

Nawrh huaihawt hi Indian Medical Association (IMA) Manipur state branch, AHPI Manipur Association for Health Care Providers of India), IOGS (Imphal Obstetrics and Gynaecology Society) leh medical pawl dangten an thlawp a ni. Heng pawlte hian September 23 zing dar 6 aṭanga September 24 zing dar 6 thleng private hospital, sorkar facility, leh mimal clinic pawh tiamin, OPD, elective surgery, leh diagnostic service-te chu darkar 24 chhung tihtawp a nih tur thu an puang.

Hetih lai hian nawrh huaihawt chungchangah civil society pawl hrang hrang, Youth Forum for Protection of Human Rights (YFPHR) leh World Meetei Organisation (WMO) Women Wing-te chuan RIMS doctor-te chu an damlo enkawlte an ngai pawimawh tawk lo tiin thuchhuah an siam thung. Tun hnaiah damlo ngaihsak lohna avangin mi panga an thih tawh thu sawiin, medical system rintlak leh langtlang tak neih an phut thu an sawi.