PM-in AP-ah Rs vbc 5,000 hu project a hawng

Prime minister Narendra Modi chuan nimin khan Arunachal Pradesh-ah hmasawnna hna thawhna tur project, Rs vbc 5,125.37 hu a hawng. PM Modi hian Indira Gandhi Park, Itanagar aṭangin virtual hmangin a hawng a ni. Project thawh tur hi hyrdropower project pahnih, Shi Yomi district-ah leh Tawang-a convention centre siamna turte a ni.

Arunachal Pradesh sorkar leh North Eastern Electric Power Corporation Limited (NEEPCO) ṭang kawpa thawh tur Tato-I hi MW 186 pechhuak thei tur a ni a, Rs vbc 1,750 senga siam tur a ni. State sorkar leh NEEPCO hnuaiah vek hian Rs vbc 1,939 sengin Heo project, MW 240 pe chhuak thei tur chu siam tum a ni bawk.

Tawang-a convention centre siam tur hi PM-DevINE scheme hnuaia thawh tur niin Rs vbc 145.37 hu senna tura tih a ni. Centre hi mi 1,500 dawl zo tura tih niin khawvel ram dang mil thei tura changkang taka siam tum a nih bakah hnam nunphung leh khualzin hip thei tura ruahman a ni bawk.

Heng bakah hian PM Modi chuan hmasawnna thlen tur project hrang hrang Rs vbc 1,290 hu a tlangzarh bawk a, heng project-te hi inkalpawhna lam, health leh kangmei laka himna pe thei turte a ni hlawm. Hawnnaah hian governor KT Parnaik, chief minister Pema Khandu leh union parliamentary affairs minister Kiren Rijiju-te'n an telpui a ni.