Assam : Bodoland Territorial Council inthlan nei ṭan

Assam-a Bodoland Territorial Council (BTC) inthlan chu nimin Thawhṭanni zing khan Bodoland Territorial Region (BTR)-a district panga, Baksa, Chirang, Kokrajhar, Tamulpur, leh Udalguri huam chhungah neih a ni. Tlai dar 4 thleng vote thlak hun hawn a ni.

BTC inthlan hi bial 40-ah neih a ni a, candidate 316 an awm. Vote nei mi mtd 2.65 chuang an awm a, an zingah hian hmeichhia mtd 1.33 leh gender dang (other gender) 17 an tel. Vote thlakna tur polling booth 3,359 siam a ni bawk.

Inthlanah hian rorellai United People’s Party Liberal (UPPL), Bodoland People’s Front (BPF), leh Bharatiya Janata Party (BJP)-te in elin, BTC chief executive member Pramod Boro, BPF chief Hagrama Mohilary leh MLA ni lai eng emaw zat chu candidate langsar zingah an tel. Vote tla hi September 26-ah chhiarin result puan nghal a ni ang.