Assam infrastructure tihhmasawnna tur inremna ziak

India sorkar chuan Assam infrastructure tihhmasawn hna thawhna turin Asian Development Bank (ADB) nen loan USD mtd 125 lakna tur inremna an siam.

Loan hi khawpui chhunga chenna tihchangtlunna tur leh Assam district parukte sik leh sa inthlak danglamin harsatna a thlen theih laka thuam chakna tura tih a ni.

Ministry of Finance-a Department of Economic Affairs joint secretary, Juhi Mukherjee chuan sorkar aiawhin loan agreement hi a ziak a, India Resident Mission country director, Mio Oka chuan ADB ai a awh thung.

Infrastructure tihhmasawnna tura Assam Urban Sector Development Project hnuaia hmalakna niin tui supply tihhmasawn, ruahtui sawngbawl leh khawl dan tihchangtlun, khawpuia zirna ina inrelbawl dan siamṭhatna tur a ni. Mi nuai 3.6 velin an chhawr thei dawn a ni.

Hmalakna hnuaiah hian tui sawngbawlna hmun paruk sak a ni dawn a, ni khatah tui litre mtd 72 vel a dah theih dawn a ni. Barpeta, Bongaigaon, Dhubri, Goalpara, Golaghat, leh Nalbari-ahte district headquarters huam chhungah km 800-a thui tui semna tur pipeline siam a ni dawn a, tui supply ṭhat leh ṭhat loh enfiahna tur system dah a ni bawk ang.

Infrastructure piah lamah, Assam district paruka inrelbawlna tihchak a ni dawn a, service pawimawh pek chhuah a nih theihnan hma lak a ni dawn bawk a ni.