Nagaland : Sorkarin NSCN (K) dan pawnah hnawl chhunzawm

Sorkar laipui chuan Thawhṭanni, September 22 khan National Socialist Council of Nagaland (Khaplang), NSCN (K) leh a hnuaia pawl awm zawng zawng chu India ram thuneihna leh dikna tichhe thei thila a inrawlh nasat avangin kum nga dang dan atan dan pawnah a hnawl chhunzawm. Khapna hi September 28 aṭangin kum nga chhung hman a ni dawn tih Ministry of Home Affairs (MHA) thuchhuah chuan a tarlang.

NSCN (K) hian Indian Union aṭanga inlakhran a, Indo-Myanmar biala Naga chen tamna hmunah rorelna hran siam an tum tih sorkar chuan sawiin, danin a hnawl pawl dang, United Liberation Front of Asom (ULFA (I), People’s Revolutionary Party of Kangleipak ​​(PREPAK) leh People's Liberation Army (PLA) zulzuia thil tih an tum tih an sawi bawk.

He pawl hi mi rukbo bakah sumdawng, sorkar official leh mipui hnen aṭangin dan phal loh sum inlaksaknaah an inhnamhnawih nia sawi a ni a, dan loa ralthuam an kawl bakah, ram danga India dodaltu sipaite hnen aṭangin ralthuam leh ṭanpuina an dawng ṭhin a ni. Hei vang hian sub-section (1) of section 3 of the Unlawful Activities (Prevention) Act, 1967 (37 of 1967) hmangin sorkar laipui chuan NSCN (K) leh a hnuaia pawl awm dangte chu danin a pawm loh pawlah a puang chhunzawm a ni.