Tripura : PM-in Mata Tripura Sundari Temple hawng

Prime minister Narendra Modi chuan Thawhṭanni khan Tripura-a Gomati district-a Udaipur khuaah Mata Tripura Sundari Temple complex siamṭhat a hawng.

Kum 524-a upa temple hi AD 1501-a Maharaja Dhanya Manikya sak niin, Shakti Peetha 51 zinga mi a ni. Siamṭhat hna hi Pilgrimage Rejuvenation And Spiritual Heritage Augmentation Drive, (PRASHAD) scheme hnuaiah Rs vbc 52 vel senga thawh a ni a, Tripura sorkar chuan Rs vbc 7 a thawh belh bawk.

Prime Minister hian state khawpui, Agartala a thlen hnuah helicopter hmangin Udaipur hi a pan nghal a ni. Temple-ah hian a ṭawngṭai bakah, complex siamṭhat dangte pawh a tlawh kual bawk. Chief minister Manik Saha, governor Indrasena Reddy Nallu leh mi pawimawh eng emaw zatin an ṭawiawm.

Temple complex hi chhawng thuma sak belh a ni a, ground floor-ah hian lobby, stall 86, multipurpose hall leh chithlum zawrhna, Prasad ghar a awm. Chhawng khatnaah dormitory leh puithiamte awmna tur siam a ni a, a chung berah ṭawngṭaina hmunpui leh Naatmandir a awm a ni. Temple complex huamchhungah hian tuikhuah thar panga siam niin, pianphunga rualbanloten awlsam zawka an kal theihna turin ramp leh lift pawh dah belh a ni bawk.

Temple-ah hian pathian pahnih - Tripura Sundari lim, ft ngaa sang leh, Chandi lim, Chhoti Ma tia hriat lar dah a ni. Temple sak ṭhat bakah 51-Shakti Peethas Park pawh Banduar-ah Rs vbc 98 senga siam a ni.