Raijor Dal President atan Akil Gogoi ruat

Krishak Mukti Sang­ram Samiti (KMSS) chuan political party an din thar, Raijor Dal president atan KMSS hruaitu, jail-a tang mek Akhil Gogoi chu an ruat. 

Raijor Dal hi nikum October thlaa din a ni a, kar liam khan a vawi khatna atan Moran-ah state convention an nei a, hetah hian an party president atan Akhil Gogoi hi an puang a ni. Dr  Hiren Gogoi chu party chief advisor atan ruat a ni a; Bhasco D Saikia, Kabindra Chetia Phukhan leh Jitul Deka-te chu working president atan ruat an ni bawk. 

January 7 khan Gauhati High Court chuan Akhil Gogoi bail dilna hi a lo hnawlsak tawh a, Gogoi-a ukil Krishna Gogoi chuan bail hnawlsak an nihna chhan tak hi an hrechiang lo a,  judgement copy pawh an la dawng lo tih a sawi. Gauhati High Court thutlukna siam hi Supreme Court-ah khin an tum tih a sawi bawk. 

Akhil Gogoi hi kum  2019, December thla khan Jorhat deputy com­missioner office kawtah Citizenship Amendment Act (CAA) dodalna lantira nawrh a huaihat avangin man a ni a, National Investigation Agency (NIA) chuan Gogoi chu India laka hel leh buaina chawkchhuaka puhin thubuai a siamsak zui a ni. 

Hetih lai hian Assam health minister leh fi­nance minister, Himant Biswa Sarma chuan Akhil Gogoi hi Citizenship Amendment Act (CAA) a dodal avanga jail-a khung a ni lo a, Maoist helpawl nena inzawmna an neih avang zawka tang niin a sawi thung. NIA pawhin CPI(Maoist) nen inzawmna an nei tih finfiahna pawh a nei a ni, a ti.