Tripura: Kum 3 chhungin ruihhlo zuar 2,700 leh a leitu 248 man an ni : CM

Tripura chief minister Manik Saha chuan kum 2022-23 aṭanga 2024-25 chhungin state chhunga ruihhlo zuar 2,700 leh a lei chhawngtu 248 man an ni tawh tih Thawhlehnia state legislative assembly favang session-ah a sawi.

CM Saha, home department changtu ni bawk chuan Congress MLA Sudip Roy Barman zawhna a chhanah tun dinhmunah ruihhlo zuar 2,729 man an ni tawh tih sawiin, ruihhlo zawrh lama inhnamhnawih mi 28 dangte chu an awmna chin hriat a nih hunah man an ni dawn tih a sawi bawk. Saha chuan Narcotics Drugs and Psychotropic Substances (NDPS) thubuaiah kum 2022 khan an mi man zinga 11.7% chu thiam loh chantir an ni tih tarlangin, kum 2023-ah thiam loh chantir 5% an awm tih a sawi bawk.

Kum 2023-24 leh 2024-25 chhungin ruihhlo leh a kaihhnawih dang zingah yaba tablet leh phensidyle-te chu West Tripura district-a Bodhjungnagar Industrial Estate rauhsan tawhah tihchhiat an ni a, High Level Drug Disposal Committee leh State Level Drug Disposal Committee chairman leh member-ten an telpui tih CM chuan a sawi. He thubuaia inhnamhnawih mi 1,970 tepawh man an ni tawh tih a tarlang.

CM chuan tun hnaiah state sorkarin prime minister Narendra Modi leh union minister Amit Shah thupek zulzuiin ruihhlo awm lohna siam tumin a bei mek tih a sawi a, ruihhlo hman sual hluar zel chuan HIV/AIDS inkaidarhna nasa takin a thlen phah a ni, a ti bawk.