Manipur : TAMOA-in nawrh huaihawt titawp lailawk

Manipur-a Teachers’ and Medical Officers’ Association (TAMOA) chuan Regional Institute of Medical Sciences (RIMS), Imphal-a nawrh an huaihawt chu tihtawp lailawk rih a ni tih puangin, damdawi-in service pawh nimin zing dar 8 aṭang khan kalpui leh a ni.

TAMOA hian RIMS general body bakah, medical lam aiawh, nursing, non-teaching staff, resident doctor leh zirlaite rawtna leh ngaihdan an ngaihtuah hnuah thutlukna hi an siam a ni. Damdawi-in thuneituten medical officer-te himna tur ziaka an siam an ennawn bakah, healthcare service bahlah avanga damloten harsatna an tawh nasat avangin nawrh huaihawt chu tihtawp lailawk a ni tih an puang.

Service chhunzawm ni mah se an thil phut tihhlawhtlin vek a nih hma chuan nawrh huaihawt leh mai thei an ni tih TAMOA chuan an sawi. An thil phut zingah hian pawikhawihtute man, doctor leh damlo inkara inhmuh thiam lohna awm sawifel tura inbiakna neih, social media-a invauna thleng vanga cybercrime alert siam, RIMS-a venhimna tihchakna atan ralthuam keng security dah leh public relation cell siamte a tel. Kar khat hnuah an dinhmun an thlirlet leh dawn tih an sawi bawk.

TAMOA chuan an thil phut chungchang hi RIMS Director, Medical Superintendent, IMA MSB leh an thawhpui staff bakah professional body-te hnenah thawn a ni tih an sawi.