Assam CM-in pink bus 25 vailiam

Assam chief minister Sarbananda Sonowal chuan hmeichhia leh kum upate pual bik tur, pink bus 25 chu Inrinni liam ta khan a vailiam. 

Heng bus-te hi 'Bhraman Sarathi Scheme' hnuaia hmeichhia leh kum upa zawkte tana free service pekna tura ruahman a ni. Assam State Transport Corporation (ASTC) chuan bus hi Guwahati khawpui chhunga kawng panga - Khanapara-Jalukbari via Paltan Bazar, Forest Gate-Jalukbari via Chandmari, Basistha Mandir-Jalukbari via Paltan Bazar, Khanapara-Jalukbari via NH/ ISBT leh Game Village/ Bhetapara-Jalukbari via Paltan Bazar-ah a tlan tir ṭhin dawn a ni. 

CM chuan ASTC bus service thar siam hian sorkarin mipuite tana rawngbawl hna a thawkna kawnga hma lakna pakhat a ni tih sawiin, passenger-te hnenah heng bus-te hi uluk taka enkawl turin a chah zui bawk. Transport minister Chandra Mohan Patowary pawhin thu sawiin, pink bus hmang hian hmeichhia leh kum upa zawkte chu him leh rang takin, a man chawi loin khawpui chhungah an kal kual theih phah dawna ni, a ti. Nikum November thla khan CM hian ASTC-in modern Bharat Benz bus 20 a tlantir tur chu a lo vailiam tawh bawk.