Sikkim : Economy leh tourism humhimna atan kawng thawmṭhat tum

Sikkim chuan tuilian leh leimin vanga chhiatna nasa thleng chuan state economy leh tourism-ah harsatna a thlen avangin a rang lama kawng pawimawh thawmṭhat leh tihchangtlun a tum.

BJP Sikkim state president, DR Thapa chuan September 24 khan union minister for road transport and highways, Nitin Gadkari chu New Delhi-ah kawmin, a rang lama infrastructure tihchangtlun an mamawh tih a sawipui a ni.

Thapa chuan kum 2023-a Glacial lui tui lian leh leimin a thlen nawn fo avangin Sikkim-a kawng pawimawh, National Highway 10 a tihchhiat dante tarlangin, fur laiin NH-10 chu khar a nih vangin bungrua supply a ti khaihlak a, state tlawhtu khualzin an tlakhniam bakah nitin mamawh man a sang hle a, eizawnna leh hospitality sector a tih chhiat thu a tarlang. Singtam leh Sevoke inkarah kawng dang siam a rawt a, hei hian inkalpawhnaa harsatna tawh ṭhinte a sukiang thei dawn niin a sawi.

Meeting-ah hian North Sikkim-a tuilian leh leiminin lei dawh 14 leh NH-10 a tihchhiat thu sawilan a ni bawk. Hun eng emaw chen siamṭhat tumin bei mah se siamṭhat theih a ni lo a, hei vang hian khaw hla leh tlawhpawh harsa Dzongu, Chungthang, Lachen, leh Lachung-te chuan harsatna an tawk mek a ni. Thapa chuan infrastructure ngelnghet tak hmanga thawmṭhat thuai a nih theihna turin ngenna a thlen nghal a ni.

BJP hruaitu chuan Sikkim khawpui Gangtok-a lirthei tam lutuk pawhin harsatna nasa tak a thlen tih sawiin, lirthei nuai 1 chuang a awm avangin nitin darkar 3-4 vel an tang ṭhin a, khawpui chhunga cheng, sumdawng, leh khualzinte inkalpawhna tihchangtlunna atan Ring Road siam a rawt bawk. Gadkari chuan sorkar laipui chu Sikkim harsat tawhte sutkian sak turin a inhuam reng thu lo hrilhin, Sikkim kawng thawmṭhatna tura project kalpui mek leh ruahmante a tarlang bawk.