Manipur police-ten Assam Rifle beitu man

Manipur Police-te chuan September 19-a Assam Rifle-te beih an nih ṭuma sipai pahnih thihna thlentu nia rinhlelh, People's Liberation Army (PLA) member Khomdram Ojit Singh, Keilal tia koh chu Nilaini khan an man. Police chuan Imphal West district-a Kameng huam chhungah Assam Rifle-te leh security force-ten beihpui an thlaknaah Keilal hi an man tih an sawi.

An manna hmuna thu an zawhfiahnaah Keilal hian PLA member a nih thu a sawi a, April 22, 2007 khan man ni tawhin bail-a chhuah tir lai mek a ni tih police-te chuan an sawi. September 19-a Bishnupur-a Sabal Leikai Nambol huam chhunga Assam Rifle-te beihnaah a inhnamhnawih ngei a ni tih an tarlang bawk.

Police-te chuan Keilal hnen aṭanga thu hriatte bawhzuiin, Loktak dil huam chhung aṭangin ralthuam leh a kaihhnawih ṭhahnem tak, pawikhawihna atana hmante chu an hmuchhuak tih sawiin, mobile handset, wallet leh Aadhaar card pawh an hmu chhuak bawk tih an sawi. He pawikhawihnaa inhnamhnawih dang pawh chhuizui zel an ni.

September 19 khan Bishnupur, Imphal-Dimapur National Highway-2-ah Assam Rifle team. hi Imphal valley-a tuilian tuarte chhawmdawl hna an thawk zo an haw lam chu mi tu tih hriat lohin an lo bei a ni.