Arunachal Pradesh : BJP-in awareness campaign kalpui

Arunachal Pradesh state BJP president, Kaling Moyong chuan East Siang District leh state chhunga BJP hruaitu team nen Nilaini khan Pasighat Market-a sumdawngte hnenah, Next-Gen GST siamṭhat chungchang an sawifiah.

Awareness programme kalpui piahlamah, Moyong chuan Siang Guest House-ah press briefing neiin, GST system thara hamṭhatna awmte a sawilang a; loneitu, mi rethei leh harsa zawkten an chhawr ṭangkai theih dan tur a sawifiah bawk.

Moyong chuan Next-Gen GST siamṭhat pawimawhnate tarlangin, Modi sorkarin mipui, a bik takin mi rethei leh lower-middle-class hnena chhawmdawlna a pek dan a sawifiah bawk. Press briefing neih zawh hian Moyong leh a team-te chuan Pasighat market-a sumdawnna hmun eng emaw zat tlawhin, tualchhung sumdawngte hnenah rose an pe bawk a ni.

Market community-te chu 'Make in India' hmalakna thlawp tura hriattirin, ram dang thil siam lei ai chuan ram chhung thil siam chhuah tilar zel turin a chah. Bungrua leh service hrang hranga chhiah lak zat tihhniam a nih avangin mipui tan a hahdamthlak tawh dawn tih Moyong chuan a sawi.