Nagaland : PMDDKY hnuaiah Mon district thlang

Nagaland-a Mon district chu sorkar laipuiin Prime Minister Dhan Dhaanya Krishi Yojana (PMDDKY) hnuaiah '100 Aspirational Agricultural Districts' a thlan chhuah zingah a tel. Union minister of agriculture & farmers' welfare and rural development, Shivraj Singh Chouhan chuan he thu hi Nagaland Lok Sabha MP, S. Supongmeren Jamir hnenah lehkha thawnin a hrilh a ni.

Sorkar laipui chuan union budget 2025-26-ah PMDDKY hnuaia '100 Aspirational Agricultural Districts' siam a nih tur thu hi a lo puang tawh a, he hmalakna hi 2025-26 aṭanga hman ṭan nghal tur a ni. Union cabinet chuan kumin July 16 khan PMDDKY hi a lo pawm tawh bawk.

Union Minister chuan PMDDKY chuan lo neih hmanga thlai thar chhuah tihpun, thlai chi tam zawk chin leh, lo neih dan ngelnghet leh tlo zawk nei thei tura hmalak chu a tum ber a ni tih a tarlang. Hei bakah Panchayat leh block level-a thlai thar chhuah dahṭhatna siam, tuikawng facility tihchangtlunte pawh a tel. He scheme hnuaia district thlan chhuaha harsatna leh inthlauhna awm ṭhinte chu Department of Agriculture & Farmers Welfare (DA&FW) leh a thawhpui Ministry/Department bakah state nen an thawhhona hmangin chinfel dan ngaihtuah a ni ang.

Chouhan chuan district, state leh national level-ah ruahmanna, a taka kalpuina leh a enkawl zuina mumal a awm theihna turin committee din a ni dawn tih a sawi a, district-a scheme an kalpui dan pawh Key Performance Indicators (KPI) hmangin uluk taka vil a ni dawn tih a tarlang. Union Minister chuan Supongmeren Jamir kaihhruainain district thuneitute leh official-te chu PMDDKY chu state-ah ṭha taka kalpui a nih theih a beisei thu a sawi.