Ziro Festival of Music-ah Sikkim CM tel

Sikkim chief minister Prem Singh Tamang chu Inrinnia Arunachal Pradesh-a Ziro Festival of Music vawi 13-na hmannaah a tel.

Tamang chuan festival chu hnam ziarang pholanna, inlungrualna leh state mawina chawimawina hun a ni tih sawiin, hnam nunphung chu khawvel changkanna nen her rem a, artist-te hun remchang siamsak, ṭhalaite tih phur leh tourism chawikanna a ni, a ti.

Sikkim aṭangin festival-ah hian state aiawhin member 200 an tel a, self-help group, entrepreneur, tour operator, biker, leh cultural artist-te an ni. Tamang chuan festival-in Plastic-Free Zone leh bawlhlawh awm lohna bakah, tualchhung artist-te 'Vocal for Local' campaign hmanga thlawpna ngelnghet pek a ngai pawimawh chu lawmawm a tih thu a sawi.

CM Tamang chuan Arunachal Pradesh chief minister Pema Khandu, deputy chief minister Chowna Mein, state sorkar leh festival buatsaihtute chu an lo dawnsawn danah lawmthu a hrilh bawk.