Meghalaya : Police-in heroin Rs vbc 2.5 hu man

Meghalaya-a West Jaintia Hills police leh state Anti-Narcotic Task Force (ANTF) ṭangkawp chuan, Pathianni zan khan Phramer Traffic Cell bulah heroin Rs vbc 2.5 hu an man. Heroin neitu mi pahnih, Manipur mi ve ve chu man nghal an ni tih Thawhṭanni khan police-te chuan an puang.

Addl. superintendent of police (MPS), Jason Mairom kaihhruaiin team-te hian thu an dawn bawhzuiin Tata motor, registration no. ML05 K 2315, Khliehriat aṭanga Jowai lam pan chu an lo ti ding a, motor an endikhnaah sahbawn bawm 50-a heroin, gram 512.63 thuhruk chu an hmu chhuak a ni. Hei bakah India pawisa Rs 6,775, South Korean won 3,000, Kazakhstan tenge 500 leh Myanmar kyat note 10 bakah, mobile phone pahnih an man bawk.

Narcotic Drugs and Psychotropic Substances (NDPS) Act hnuaiah thubuai ziahluh a ni a, chhuizuina neih chhunzawm tura tih a ni bawk. Police-te chuan mipui chu fimkhur tur leh thil rinhlelhawm nia an hriat chu law enforcement agency hnenah thlen turin an ngen.

West Jaintia Hills superintendent of police, Jagpal Singh Dhona chuan ruihhlote hi motor chhungah thiam taka thuhruk ni mah se, a hun taka police team chet chhuahna leh an hmalakna avangin awlsam taka man a ni tih a sawi. Ruihhlo leh a kaihhnawih do tur leh, ṭhalaite tana himna thlen turin theitawp an chhuah zel dawn tih a sawi.