AP : Zirlai pawlin Chakma-Hajong te ST status dil dodal

Arunachal Pradesh-a All Changlang District Students’ Union (ACDSU) chuan an state-a Chakma leh Hajong hnamten Scheduled Tribe (ST) status an dilna chu an dodal tih sawiin, pawm theih a ni lo tih an sawi.

ACDSU chuan Inrinni liam ta khan thuchhuah siamin, Chakma-Hajong te ST status pek an nih chuan state leilung fate dikna, nihna leh himna te chu a tiderthawng thei dawn a ni, an ti. Ram danpui hnuaia humhalhna pekte chu Arunachal Pradesh leilung fate tana tih a ni a, leilung fa ni lote huam tir ve tur a ni lo, an ti.

Kar liam ta Zirtawpni khan Chakma leh Hajong hnam pawl hrang hrang intelkhawmte chuan Joint Action Committee (JAC) hmingin ST status pek phutin Diyun-ah kawng an zawh a ni. An hnam pahnihin harsatna hrang hrang an tawh ṭhinte chinfel dan ngaihtuah an phut bawk.

Zirpawl pawl chuan Chakma leh Hajong hnam thil phut chungchangah phurpui leh thlawp zawnga hma la lo turin political party, pawl leh mimalte an chah a, ram leilung fate dikna chanvo palzut zawnga hma lakna reng rang dodal turin a ngen. State sorkar leh sorkar laipui chu Arunachal culture leh leilung fate dikna chanvo humhalh sak turin an chah bawk a ni.