APSC prelims Assamese leh English-in neih a ni dawn : Assam CM

Assam chief minister Himanta Biswa Sarma chuan, Assam Public Service Commission (APSC) Combined Competitive Examimation (CCE) chu English leh Assamese-in neih a ni tawh dawn tih a social media-ah a puang.

CM chuan prelims hi English chauha neih ṭhin a ni a, Assamese-medium institution zirlai candidate, a bikin thingtlang lamin harsatna an tawk nasa tih a sawi. Hei vang hian an hnam ṭawng, Assamese a neih tel theih tura ruahmanin, hei hi cabinet pawhin a pawm tawh a ni.

Sarma chuan candidate-ten chanvo in ang tlang an neih chu sorkarin a ngai pawimawh tih sawiin, Assamese ṭawnga APSC CCE Prelims buatsaih chuan ṭawnga harsatna awmte a tihbo dawn bakah, candidate-ten dik leh felfai takin exam an hmachhawn thei dawn a ni, a ti.

Candidate-te chuan exam tam zawk chu Assamese leh English-ah duh an thlang thei tawh dawn a, General Studies Paper-II-a comprehension section bik erawh chu English a exam a ngai dawn thung a ni.

Sorkar ruahmanna siam thar hi zirna lama mi thiamte chuan an fak hle a, Assamese-medium zirlai prelims hmachhawn duh pawh an tam phah dawn a, thingtlang leh khawpuia zirlaite inkara inthlauhna awm pawh a titawp thei dawn niin an sawi.