Assam : Singapore-ah police team tir dawn

Assam chief minister Himanta Biswa Sarma chuan Thawhṭanni khan Indian singer leh composer, Zubeen Garg thihna chhui chiannaah India chuan Singapore a pui dawn a, special investigation team (SIT) tirh a ni dawn tih a sawi.

September 19-a Singapore tuipuia tla hlum, Garg thih dan chhui chiang turin Assam sorkar chuan member 10 awmna SIT dinin, special DGP MP Gupta chuan a kaihruai dawn a ni. Kum 52 mi zaithiam hi North East India Festival-a zai tura kal a ni. Tuipuia yatch-a an chhuahnaah tuiah a tla hlum a ni. Event buatsaihtu, Shyamkanu Mahanta chu ni hnih hnuah man a ni dawn tih CM chuan a sawi a, Assam SIT chuan Garg-a manager, Siddartha Sarma pawh an man thuai dawn tih a sawi bawk.

Sarma chuan Garg-a thih dan chhuinaah an tel theihna turin Singapore chu inremna siampui tura sorkar laipui hnena ngenna an thlen thu leh, rawtna hi sorkar laipuiin Singapore-ah a thawn tawh a, SIT team chu Singapore-ah an kal dawn tih a sawi. Ni 2-3 chhungin event buatsaihtu Shyamkanu Mahanta man chhan tur eng emaw zat hmuh chhuah beisei a ni a, Siddartha Sarma pawh a awmna chin hriat tawh niin, hun tiam chhunga a inpe lo a nih chuan man a ni ang, a ti.

Assam DGP Harmeet Singh chuan team pakhat chu Delhi-ah an awm a, SIT official pahnihte chu Singapore-ah an kal dawn tih a sawi. Singapore nen pawh Mutual Legal Assistance Treaty (MLAT) an neih thu sawiin, document-te chu Ministry of Home Affairs-ah thlen a ni dawn a, hmalakna pawh neih ṭan tawh a nih thu a sawi.