Tripura : PM Modi tihmingchhetua puh lakah FIR theh lut

Tripura police-te chuan digital content creator pakhatin social media-a prime minister Narendra Modi tih hmingchhiatna lam hawi a post avangin FIR an theh lut.

East Agartala police hnuaia Pratapgarh-a cheng, Madhabi Biswas chuan September 22-a PM-in Gomati district-a Maa Tripura Sundari temple a tlawh chungchang sawiselna video chu September 25 ah a post a ni. Prime Minister-in temple a tlawh chhan zawhna zawtin, minute 35 chauh awh tur atan mipui vantlang sum hman a nih thu leh, minute 35 tlawhna hun atana hman ai chuan Delhi aṭangin online-in ṭawngṭaina a neih theih thu a sawi a ni.

He video hi thehdarh a nih hnuah, Yuva Morcha hruaitu Rahul Battacharjee chuan Biswas lakah complaint a theh lut a ni.East Agartala police station officer-in-charge Subrata Debnath chuan Yuva Morcha hruaitu pakhat hnen aṭanga complaint an dawn hnuah court aṭanga phalna lain Biswas lakah thubuai ziah luh a ni tih a sawi.

Hei bakah Mohila Morcha (BJP) hruaitu pakhat chuan, West Agartala police station-ah Biswas lakah complaint dang a thehlut bawk. West Agartala police station officer-in-charge Rana Chatterjee chuan FIR ziahluh a nih theihna turin court phalna an dil tih a sawi ve bawk.