Meghalaya-in anti-terror squad din

Meghalaya chuan firfiak leh helpawl kaihhnawihte do hna thawk a, state venhimna tihchakna turin Anti-Terror Squad (ATS) a din. Chief minister Conrad K Sangma chuan Thawhṭanni khan Shillong police headquarters-ah temporary office a hawng nghal bawk.

ATS hi state elite SF10 Commando Unit aṭangin mi 50 dah an ni dawn a, deputy inspector general of police-in a kaihruai ang. Firfiakte vauna, bomb hmanga intihṭhaihna leh thil rinhlelh awmte chhui zui hna an thawk dawn tih deputy chief minister in-charge home (police) Preston Tynsong chuan a sawi. Commando-te hian firfiakte beih let leh an mi hrente chhanchhuah hna thawh dan turah training hautak tak an lo nei tawh a ni.

ATS-ah hian pawl pahnih - jungle warfare leh khawpui chhunga hnathawk tur an awm dawn a ni. A bikin Garo Hills-a kalpui tura ruahman niin, ralthuam, hmanrua leh, training resource changtlung tak hmanga thuam a ni dawn tih Eastern Range DIG DAvies NR Marak chuan a sawi. ATS hi Union Ministry of Home Affairs-in state hrang hranga firfiak dona tur bik din tura thupek a siam bawhzuia din a ni.