Assam : NH-715 tihzauh leh thawmṭhat remti

Prime minister Narendra Modi kaihhruai, Cabinet Committee on Economic Affairs (CCEA) chuan Kalibor- Numaligarh section-a NH-715 4-lane a tihzauh leh thawmṭhat a remti. Project senso atan Rs vbc 6,957 ruahman a ni.

Engineering, Procurement and Construction (EPC) mode-a kalpui tur project hi km 85.675-a thui a ni dawn a, hna an thawhnaah Kaziranga National Park (KNP)-a ramsa awmten harsatna an tawh lohna turin hmalakna kalpui a ni bawk ang.

Two-lane highway awmsa hian mipui chen tamna hmun- Jakhalabandha (Nagaon) leh Bokakhat (Golaghat) te a paltlang a, Kaziranga National Park chhim lam ramri a kaltlang a ni. Park-a lirthei tlan tam leh tuilian thleng ṭhin vangin, ramsate chu Karbi Anglong Hills pan turin highway an paltlang a ngai a, chetsualna leh thihna a thlen fo ṭhin a ni. He harsatna tihziaawmna atan project hian ramsate zalen taka an kal theihna tur, km 34.5-a thui elevated corridor a siam dawn a, at-grade km 30.22 tih zauh, Jakhalabandha leh Bokakhat chhehvela greenfield bypass km 21-a thui siamte pawh a huam dawn a ni. Guwahati, Kaziranga National Park leh Numaligarh inkarah inkalpawhna mumal tak siam tum a ni bawk.

Highway thawmṭhat hian NH-127, NH-129, SH-35, airport pathum (Tezpur, Lilabari, Jorhat), leh rel station pathum (Nagaon, Jakhalabandha, Vishwanath Chariali)-te inzawmna a tichangtlung dawn bawk a ni. Tezpur leh Nagaon fishing cluster, Karbi Anglong leh Wokha-a social hub, sakhua leh khualzin tlawh tamna hmun, Kaziranga National Park, Kakochang Waterfall, Baba Than Temple, leh Maha Mrityunjay Temple-a sum lak luh tipung thei tura beisei a ni.