Manipur : Ukhrul-a chhungkaw 1,000 chenna tur in sa dawn

Manipur Development Authority (MDA) chuan Kerala-a NGO pakhat, High Range Rural Development Society (HRDs) India nen thawkdunin, Manipur-a mi rethei leh hnuaihnung zawk, a bikin thingtlanga tribal chen tamna hmunah chenna in an sa dawn.

Naga People's Front (NPF) chuan Manipur-a Naga hnam chen tamna, Ukhrul district-a tribal chhungkua harsa zawkte chenna tur in 1,000 sak tum a ni tih an tarlang a; lawmawm an tih thu an sawi. Hemi atana 44-Ukhrul AC MLA, Ram Muivah hmalakna chu lawmawm an tih thu an sawi bawk.

NPF chuan kum thum chhunga state-a buaina thleng vanga chhungkaw tam tak insawn chhuahna hmun, Churachandpur leh Kangpokpi bakah Imphal Valley hmun ṭhenkhata chenna in tur sak a nih theihna turin thuneitute an ngen bawk. Hei bakah Manipur Governor leh sorkar laipui chu state chhung buaina avanga chenna in leh lo chhuahsan chhungkuate tan 'Permanent Housing Scheme' siam thuai turin an ngen.

Chenna in man tlawm zawk sakna tur, Pradhan Mantri Awas Yojana (PMAY) chu a taka kalpui a nih theihna tura hma la tura ngenin, NPF chuan chhungkua chenna tur mumal nei lote tan rorelna, tualchhung aiawh, leh civil society-ten thawhhona ṭha an neih a pawimawh tih an sawi.