Tripura : Dharmanagar sub-jail aṭangin mi 6 paruk tlan chhuak

Tripura-a Dharmanagar Sub-Jail aṭanga jail aṭangin Nilaini zing khan tang paruk an tlan chhuak a, an zinga pakhat chu man a ni leh tawh. Tang tlanchhuak an awm vang hian sorkar chuan nimin khan jail official panga - jailor pakhat leh warder pali a suspend.

North Tripura-a hail tang paruk tlan chhuak zingah hian Bangladesh mi pakhat pawh telin, security guard pakhat, Bedu Miah chu hriamhrei nen an beih hnu zing dar 6 velah an tlan chhuak tih officer pakhat chuan a sawi. Security guard hian hliam tuarin Dharmanagar District Hospital-ah enkawl mek a ni. Tang tlan chhuak la man lohte hi North Tripura leh a chhehvel Unakoti district-ah zawn beihpui thlak mek a ni.

Inspector General of Prisons thupek angin Dharmanagar Sub-Jail-a jailor, Dhananjoy Bhattacharya chu tang tlanchhuah chungchangah chhuichian a ni dawn. Bhattacharya hi suspend nghal a ni, warder pali te pawh suspend niin disciplinary action lak tum a ni. Suspend an nih chhung hian Kailashahar District Jail, Unakoti Tripura-ah dah an ni dawn a, thuneitu phalna la hmasa loin an chhuah khapsak an ni bawk.