Assam : MHA-in tuilian venna project atan Rs vbc 692 sanction

Assam minister Pijush Hazarika chuan Zirtawpni khan, Ministry of Home Affairs (MHA) chuan an state-a tuilian thleng ṭhin venna turin, state chhunga hmun hnawng leh tui awm tamna (wetland)-a tuikhuah siamna tur Rs vbc 692 a sanction tih a sawi.

Guwahati-a press conference neihah Hazarika chuan he thu hi sawiin, union home minister Amit Shah-a'n Assam tuilian venna atana tuikhuah siamna tur a ruahman chu lawmawm a tih thu a sawi. Thla thum liam ta khan state sorkarin wetland-ah tuikhuah siamna tur hmun 15-ah phalna a nei tawh a, tender pawh siam a ni tawh tih a tarlang.

Minister chuan kum nga liam ta chhunga sorkarin hlawhtling taka hma a lak tawh dante tarlangin, tuilian venna atana daidanna, embankment chu tuipui kam km 900 a thuiah siam zawh a ni tawh a, kum 1947 - 2021 inkarah Assam-a tuipui kam km 4,500-a thuiah embankment hi siam a ni tawh a ni, a ti. Km 150 chauh siam ngai a awm tawh thu leh, an state-a tuilian thleng ṭhin pawh 70% in a tlakhniam thu a sawi bawk.

Tuilian venna tura hmalaknaah chief minister Himanta Biswa Sarma kaihhruainain, water resources department chuan kumtin Rs vbc 2,000 a seng ṭhin tih Hazarika chuan a sawi. ADB loan angin Rs vbc 1300 man hu project thawh a ni dawn a, NABARD-in a sponsor hna Rs vbc 300, Union Home Ministry hnuaiah Rs vbc 692 leh ADB-sponsor hna, Rs vbc 1300 te chu an thawk dawn tih a sawi.