Tripura-a Mata Tripurasundari Temple chei nan Rs vbc 37.8 ruahman

Union ministry of tourism-a Pilgrimage Rejuvenation and Spirituality Augmentation Drive (PRASAD) scheme hnuaiah, Tripura-a Mata Tripurasundari Temple thuam ṭhatna atan sorkar laipui chuan cheng vaibelchhe 37.8 a ruahman. 

Hemi chungchang hi chief minister Biplab Kumar Deb chuan a twitter-ah tarlangin,  Tripura mipuite aiawhin prime minister Narendra Modi leh union tourism minister Prahlad Singh Patel-te chungah lawmthu a sawi. Sorkar laipui chuan kum 2014-2015 khan ministry of tourism hnuaiah PRASAD scheme hi a kalpui ṭan a ni.  He scheme hnuaiah khualzin tam zawk hip luhna turin Tripurasundari Temple chei ṭhat hna hi thawh a ni dawn a ni. 

Tourism secretary Kiran Gitte chuan temple chei ṭhatna tur project hi Tourism Development Corporation Limited (TTDCL) in a thawk dawn tih sawiin, state sorkar chuan an state-a tourism sector chawikanna turin kawng hrang hrangin hma a la mek tih a sawi bawk.

Tripurasundari temple hi Udaipur khua aṭanga km 5-a hla tlang chhipa awm a ni a, kum 1501 AD-a Maharaja Dhanya Manikya sak a ni. He temple hi Hindu-te sakhaw hmun pawimawh Peethas 51 zinga pakhat a nih avangin Hindu sakhaw zuitute tana hmun pawimawh tak a ni. Temple hnung lamah hian Kalyansagar dil a awm a, dilah hian tortoise tam tak an cheng a, hei vang hian he temple hi Koorma (tortoise) Pith tia sawi a ni bawk.