BJP President-in Assam tlawh

Bharatiya Janata Party (BJP) national president JP Nadda chuan nimin khan ni hnih cham turin Assam a tlawh a, a cham chhung  hian chief minister Sarbananda Sonowal leh state party hotute meeting a neihpui ang.

Assam-ah hian kumin April thla vel hian assembly inthlan neih a ni dawn a, inthlan neih tur atan hian political party hrang hrangte chuan ṭan an la nasa tawh hle. BJP President hian an party tana election campaign bul a ṭanpui dawn a ni. Nimin khan Silchar-a Barak Valley-a public rally neihah thu a sawi a ni. 

A ṭum khatna atan kum 2016 inthlanah khan BJP hian sorkarna a siam a, tun hnaia local body inthlan neihah te pawh an la chet ṭhat chhunzawm avangin assembly inthlan neih turah pawh hnehna chan leh ngei an tum ruh hle. 

JP Nadda hi BJP na­tional general secretary BL Santosh, national vice president leh party in-charge Assam Baijayant Jay Panda-te an ṭawiawm. Nimin vek khan Silchar aṭangin Guwahati-ah kalin, party hruaitu hrang hrangte meeting a neihpui nghal bawk. Vawiin hian Kamkhya temple a tlawh ang a, Guwahati aṭang hian Delhi panin a kir leh dawn a ni.