Assam : Sorkarin Orunodoi 3.0 tlangzarh

Assam sorkar chuan October 7 khan hmeichiate puihna tura atana scheme siam, Orunodoi 3.0 a tlangzarh leh a, scheme thawh thumnaah hian huang zauhin, hamṭhatna dawng thei tur hi hmeichhe nuai 38 chuang an tling.

Guwahati-a scheme tlangzarh inkhawm neihah chief minister Himanta Biswa Sarma chuan Orunodoi 3.0 chu Assam-a retheihna dona kawnga hmalakna lian ber a ni, a ti.

Orunodoi 3.0 hnuaia hamṭhatna dawngtute chuan thla tin Rs 1,250 an dawng dawn a, hei bakah LPG cylinder leinaah Rs 250 subsidy pek an ni ang. Hmeichhe nuai 38 chuang hnenah Rs 1,250 pek nghal an ni a, Assam chuan sum hmanga puihna a pekna, Orunodoi3 chu a huang zauh zelin, state chhunga retheihna dona scheme lian ber a ni ta a ni, tiin Sarma chuan a social media X-ah a tarlang.

Chief Minister chuan he scheme hian chhungkaw sang chuang retheihna lak aṭangin a chawikang tawh a, dikna leh zahawmna an neih theihna turin nasa takin a pui a ni, a ti. Orunodoi nena inzawm Antyodaya chu mipui ṭanpuina tur niin, chhungkua hmaih bik an awm dawn lo tih a tarlang bawk. Sarma chuan hamṭhatna dawngtute tan bika thil an buatsaih chu nakkum February hian tlangzarh a ni dawn tih a sawi a, a kimchang erawh a tarlang lo.

Assam sorkar hian Orunodoi bakah welfare programme hrang hrang hnuaiah a thlawna buhfai sem, pulse leh LPG cylinder man tlawm zawka lei theihna, a thlawna zirna, zirlai hmeichhiate tana hamṭhatna bakah healthcare facility a thlawna hman theihna turte pawh a kalpui mek bawk.