Tripura : Ruihhlo Rs vbc 70 hu man

Assam Rifle leh customs official ṭangkawp chuan, Tripura-ah ruihhlo Rs vbc 70 hu an man. Ruihhlo zuartu mi pali pawh man nghal an ni tih Thawhlehni khan official-te chuan an sawi.

Defence thupuangtu chuan ruihhlo tawlhruk dona kawnga beihpui thlakna neih mekah, Assam Rifle leh customs official thawk ho chuan Khowai district hnuaia Singhichhara bialah ruahmanna fel tak siamin beihpui an thlak tih a sawi. Team thawk dun hian ruihhlo tawlhrukna atana an hman cement phur truck pahnih chu manin, methamphetamine tablet kg 69.61, Rs vbc 70 vel man chu an hmuchhuak a ni.

Ruihhlo tam tham tak man hi kumin September 29-a Mohanpur, West Tripura district-a hlawhtling taka beihpui an lo thlak tawh chhunzawmna a ni. Hemi ṭum hian methamphetamine tablet, Rs vbc 60 man hu chu an lo man tawh bawk. Uluk taka enfiah a nih hnuah helai biala ruihhlo tawlhrukna hmun pawimawh leh network kalpui mekte chu hriatchhuah a ni tih defence thupuangtu chuan a sawi.

Senior police official chuan methamphetamine tablet, Yaba emaw party tablet emaw tiha hriat bawk chu Myanmar aṭangin Mizoram leh Assam chhim lam kaltlangin Tripura-ah hian Bangladesh-a tawlhruk tura phurh thlen ṭhin a ni tih a tarlang.