Sikkim : CM-in New Delhi-ah PM hmu

Sikkim chief minister Prem Sing Tamang chuan Thawhṭanni khan prime minister Narendra Modi chu New Delhi-ah a hmu a, state hmasawnna leh hun rei tak daih tur hmasawnna chak zawka kalpui dan tur leh, infrastructure tihchangtlunna tura thil pawimawhte a sawipui.

Inbiakna an neihah kawng inthlunzawmna pawimawh tihchak chungchang an sawi dun a, National Highway NH-10 leh NH-310A, an state tana kawng pawimawh tak chu ngaih pawimawh a ṭul thute pawh an sawi. Chief Minister chuan tun hnaia tuilian leh leimin thleng in kawngpui a tihchhiatte siamṭhat hna thawhna atan sorkar laipui ṭanpuina a dil nghal bawk.

CM Tamang-a'n rawtna a thlen zingah West Bengal-a Bagrakote aṭanga Sikkim-a Rorathang thlenga rel kawng thar siam pawh a tel a ni. Nepal nen insumdawn tawnna tihchakna tura multimodal corridor siam a ṭul thu pawh sawilangin, sorkar laipui leh state chuan infrastructure, veivahna tihchangtlun leh khawsak phung chawikanna turin thawh hona ṭha tak an nei tih a sawi. Sikkim thuam chakna tur, venhimna leh tlawhpawh nuam zawk a nih theihna tura ruahmanna siam a ni a, sorkar laipui chuan state hmasawnna tura hma lakna chu a thlawp chhunzawm zel dawn tih a tiam bawk.