Nagaland : Deputy CM-in healthcare sector sum leh pai siamṭhat phut

Nagaland deputy chief minister TR Zeliang chuan, Thawhlehni khan hmarchhak bial pumpuia healthcare hman awlsam leh intluktlanna a awm theihna turin sum leh pai enkawl dan siamṭhat a ngai tih a sawi.

Chumoukedima Northeast Region-a Health Financing Forum for Cross-State Learning hawnna inkhawma thu a sawiah, Zeliang chuan he forum hi policy siamtute, health professional-te leh mithiamte tan ngaihdan leh tawnhriat inhrilhtawnna hmun pawimawh tak a nih thu a sawi a, helai biala healthcare zau zawka kalpui a nih theihna turin a pui dawn a ni, a ti.

Zeliang chuan World Bank leh Nagaland chu hun rei tak an lo thawk dun tawh a, Nagaland Health Project chuan health sector pawh a tihchak phah tih sawiin, result-based financing (RBF) model hman a ni, a ti. He hmalakna hian service rintlak pek leh hnathawh dan pawh a tichangtlung tih a sawi a,RBF kaltlang hian healthcare facility chu sum leh pai enkawlna kawngah langtlang leh rinawm zawkin kalpui a nih thu a tarlang.

Zeliang chuan mipui pung zel leh, natna inthlak danglam bakah sik leh sa inthlak danglamin nghawng a nei nasa chu hmachhawn thei turin state sorkar chuan healthcare system ngelnghet siam a tum tih a sawi. Hemi kawngah hian hmarchhak state-te chu inlungrual taka thawh hona neih a duh tih a tarlang bawk.