Assam : Sorkar laipuiin tuilian tuar chhawmdawlna tur Rs vbc 313 pawm

Sorkar laipui chuan 2024-a Assam-a tuilian avanga harsatna tawkte chhawmdawlna leh ṭanpuina turin Rs vbc 313.69 pek belh a remti. Union home minister Amit Shah kaihhruaia Thawhlehnia high-level committee meeting neihah he ṭanpuina sum pek tur hi pawm a ni.

Ṭanpuina sum pek belh tur hi NDRF (National Disaster Response Fund) aṭanga pek tur a ni. Assam bakah Gujarat tuilian tuarte chhawmdawlna turin Rs vbc 394.28 pek belh an remti bawk.

Sorkar laipui hian financial year 2025-26 chhungin chhiatna thlenna state 27 te ṭanpuina turin SDRF (State Disaster Response Fund) hnuaiah Rs vbc 13,603.20 leh, NDRF hnuaiah state 12-ah Rs vbc 2,024.04 a pe chhuak tawh a ni. Hei bakah chhiatna thleng thei laka invenna turin State Disaster Mitigation Fund (SDMF) aṭangin state 21 hnenah Rs vbc 4,571.30 leh, National Disaster Mitigation Fund (NDMF) aṭangin state pakua hnenah Rs vbc 372.09 pek a ni bawk a ni.

Ruahsur nasa avangin Jorabat-a NH-27 tuilianin a chim

Pathiannia ruahsur nasa tak avangin Jorabat, Assam-a National Highway 27 (NH-27) chu tuilianin a chim a, Guwahati leh Upper Assam inkara lirthei tlan dan pawh a tibuai nasa hle.

Jorabat flyover hnuai chu tuiin feet li vel thlenga a chim avangin lirthei-te chu flyover lamah tlantir an ngai a ni. Tuilian hian lirthei eng emaw zat a chim bawk.Thuneitute chuan flyover hnuai kawnga lirthei tlan an khap rih a ni.

Official-te chuan ruah a sur chhunzawm zel chuan tui chim chin a sang dawn tih an sawi a, mipui tan harsatna nasa zawk a thleng thei tih an sawi.