Vawiinah State pahnihah by-election nei dawn

Tripura-a Barjala leh Khowai assembly by-election neih tura campaign hun chu Ningani khan a tawp tih Election Com-mission chuan a puang a, vawiin hian an inthlang ang. Vawiin vek hian Arunachal Pradesh-a Khowai constituency by-election neih a ni dawn bawk.

Barjala seat hi Congress legislator Jitendra Sarkar-an June 6, 2016 khan a chhuahsan a, MLA a nihna a aṭangin a bang a ni. Khowai hi CPI-M legislator Samir Deb Sarkar-a chhuahsan a ni thung. Hmun ruak luah tur hian Communist Party of India-Marxist (CPI-M), Left Front, Trinamool Congress (TMC), Bharatiya Janata Party (BJP) leh Congress party te chuan candidate an thehchhuak. Bial khatah hian candidate panga ve ve an awm. BJP state President Biplab Kumar Deb chuan hnehna an chan ngei tur thu sawiin, BJP vote turin mipuite a sawm. BJP hian Tripura Civil Service Officer hlui Shista Mohan Das chu Barjala seat chuh turin an thehchhuak a, Khowai-ah Tapan Kumar Paul a ding dawn bawk.

Hetih lai hian minister hlui Prakash Das chu Barjala constituency-ah TMC ticket-in a ding dawn a, CPI-M hruaitu hlui Manoj Das chu Khowai bialah a ding thung ang. Left Front lam chuan Jhumu Sarkar leh district party secretary Biswajit Datta-te an thehchhuak ve bawk.

AP-a Hayuliang by-election neih turah hian candidate mi pali te chuan nomination file-in, Independent candidate pahnih - Yompi Kri leh Konteso Kri-te an awm. BJP chuan Arunachal chief minister hlui, Kalikho Pul-a nupui Dasanglu Pul-i an thehchhuak a, hetih lai hian Congresss Candidate Lapalum Kri-a nomination file erawh hnawlsak a ni thung. Vote tla te hi November 22-ah chhiar a ni ang.