KNP-ah sapeltute che leh

Assam forest department official chuan tun hnaiah Kaziranga National Park-ah sapeltuten samak an kap leh tawh tih a tarlang.

KNP Divisional Forest Officer Suvashish Das chuan silai puak ri an hriat hnuah hnu chhui hna thawh ngahl a ni a, a hnuah samak hliam tuar an hmuh thu sawiin, Tunikati forest camp-ah enkawl a ni, a ti. Sapeltute chu zawn nghal an nih thu sawiin, pawikhawihna a thleng leh ta chu a pawi hle a ni, a ti.

Hun eng emaw chen sapel thawm hriat tur a awm loh hnuah June 18 leh October 19 khan Kaziranga-ah hian samak pakhat ve ve kahhlum a ni a, an ki lak a nih hnuah sapeltute chuan an kalsan a ni. Hemi chungchangah hian state DGP chuan Park Kohora Range office-ah KNP official, security, Forest Department official, Village Defence Party (VDP) leh police officer eng emaw zat chu meeting a lo neihpui tawh a ni.

State sorkar chuan sapeltute chetna khuahkhirh tur hian theihtawp chhuahin a bei a, sorkar laipui pawhin kawng hrang hrangin a pui ve bawk. Heti chung hian samak ki hmanga sumdawnna chu a len tham em avangin a tawp mai thei rih lo a ni. Samak ki te hi sapeltute hian ṭhenawm ram Bangladesh leh hmun dangah te man to tak takin an hralh a, heta ṭang hian khawvel hmun dangah thawn chhuah a ni leh ṭhin.

Kumin April khan British lal tupa Prince William leh a nupui Kate-te chuan zan thum riakin Kaziranga National Park hi an tlawh a, an cham chhung hian sapeltute chuan sa an pel reng tho. Samak ki pakhat nei, KNP-a awm zat hi khawvel puma awm zawng zawng zat ve aia tam mah a ni a, hei hi Assam chuan a larpui hle a, theihtawpin humhalh tumin a bei mek a ni.