TPCC-te'n pawisa thi duhlohna lantir dawn

Tripura Pradesh Cong­ress Committee (TPCC)-te chuan sorkar laipuiin pawisa note pahnih a tih thih avanga lungawi lohna lantirin, November 30 hian state pumah nawrh huaihawt an tum thu an sawi.

Tripura Congress chief Birajit Sinha chuan, Rs 500 leh Rs 1,000 note thi chuan mipui nawlpui a nghawng thu sawiin, state chhunga bank hrang hrangte chu khar tir vek an tum thu a sawi. Mipui nawlpuiin harsatna an tawh laiin, Prime Minister Narendra Modi leh a laina hnaite chuan harsatna an tawk ve lo niin a sawi. Sinha chuan hetiang renga harsatna an tawk a nih chuan, state economy thlenga a nghawng a hlauhawm niin a sawi bawk.

Pawisa note thi avanga mipuiten harsatna an tawh chungchang hi Tripura Chief minister Manik Sarkar chuan PM Modi hnenah a thlen a, harsatna sutkian thuai a nih theih nana hma la turin a ngen tih a sawi. Sarkar chuan mipuiten harsatna nasa zawk an tawh lohna turin sorkar laipui chu electricity bill, house tax, water tax , road tax , motor vehicle registration fee, land registration fee leh a dangah te Rs 500 leh Rs 1,000 note hlui chu November 30 thleng hman phalsak turin a ngen tih a sawi. Manipur khawpui Imphal-a Khwairamband Keithel market-ah pawh pawisa note thi Rs 500 leh Rs 1,000 hmangtute aṭangin, money dealer-te chuan Rs 200 an laksak ṭhin nia tarlan a ni.

Manipur media-te chuan pawisa harsatna avang hian chanchinbu pawh hun eng emaw chen tihtawp lailawk a nih thu an sawi. Newspaper Publishers’ Association leh All Manipur Newspaper Sales and Distributor-te chuan newspaper tihtawp lailawk a nih chungchangah mipuite hriatthiamna an ngen.

Money dealer-te hian Rs 1,000 note-ah Rs 200 te an laksak ṭhin a, ni khatah Rs 20,000 bawr velte an khawih che ṭhin nia tarlan a ni. Hetih lai hian sorkar laipui chuan pawisa note thih hman theih hun chhung chu November 24 zanlai thleng atan a pawtsei tawh a ni. Khwairamband Keithel market-a dawr tam zawk ten pawisa thi an dawn duh loh avangin mi tam takin harsatna an tawk a, hei hi remchangah hmangin money dealer-te chuan hlep neiin pawisa an thleng sak
ṭhin a ni.

Hetih lai hian State Bank of India (SBI) chuan Assam khawpui Guwahati-a ATM 12 te chu chhun zan zawma hawn a nih tur thu a sawi. Pawisa note thi avanga mipuiten harsana an tawh mek sutkianna tura ruahman a nih thu a tarlang bawk.