China-in India Badminton Team Manager visa dilna hnawl sak

Arunachal Pradesh State Badminton Association secretary Bamang Tago chu Thaihot China Open championship 2016, Fuzhou-a khelh mekah India badminton team manager atan ruat ni mah se, China sorkarin visa a dilna a hnawl sak avangin a tel thei lo.

Delhi-a Chinese embassy thuchhuah chuan, Tago chu Arunachal mi leh sa a nih avangin visa pek a ni lo tih a sawi. November 15-a ṭan Thaihot China Open-ah hian Tago hi player 14 hruai tura tih a ni a, visa a dilna hnawl sak a nih vang hian a kal ve thei ta lo a ni. India aiawha fechhuak te hian Nilaini khan an match hmasa ber an khel. Visa chungchangah harsatna a tawh hi Tago chuan union minister of state for home affairs Kiren Rijiju a sawipui tawh thu a sawi.

Badminton Association of India (BAI) chuan India aiawha fehchhuak tur infiam mite document pawimawh chu Chinese Embassy-ah a thehlut vek a, mi 13 te chu visa pek an ni a, November 12 khan an manager Tago tel lo hian an fehchhuak ta a ni. BAI official Anand Kare chuan hemi chungchang hi chhui zui a ni a, embassy lam chuan China sorkar aṭanga pawmpuina a ngaih thuin an chhang niin a sawi. Hei hi tun hnaia India leh China-te'n Arunachal chungchanga an buaina nghawng a nih theih thu a sawi lang bawk.

Ministry of External Affairs’ official spokesperson Vikas Swarup chuan, he thil thleng hi sorkar laipui chuan a ngai thutak hle tih sawiin, ram pahnihte inkar tichhe thei thil a ni a, a pawi hle a ni, a ti. China-in a ram bung pakhata a chhiar Aru-nachal Pradesh chu, Tibetan sakhaw puithiam Dalai Lama-a'n nakkum kum tir khian tlawh a tum a, hei hi China chuan a duh lo hle. Hetiang boruak vel avang hian China chuan phuba lak nan a hmang niah mi tam tak chuan an ngai a ni.

Kum 2011 khan India karate team member panga, Quan-zhou-a neih Asian Karate-do championship inelna hmachhawn tura kal tumte visa dilna chu Chinese Embassy chuan a lo hnawl sak tawh. Kum 2012 khan Arunachal weightlifter-te visa dilna chu a lo hnawl sak tawh a, October 2013, khan Wuxi-a Youth World Archery Championship neihah Arunachal Pradesh archer pahnihte chu visa avang bawkin an tel thei lo a ni.

India badminton team mana-ger atana ruat Bamang Tago chuan, China-in international sports event pawimawh tak tak a thlen fo avangin, hun lo la kal zel turah Arunachal infiam miten harsatna an tawh a hlauh thu a sawi. Thaihot China Open championship 2016, Fuzhou-a khelh mek hi November 20 hian a zo dawn a ni.