By-election : Assam, AP leh Tripura-ah vote a tla tha

Hmarchhak state pathum Assam, Arunachal Pradesh leh Tripura-ah te kar kalta Inrinni khan by-election neih a ni a, vote a tla ṭha tlangpui.

AP-ah chuan vote tla zat hi 72% a tling phak a, China ramri depa awm Anjaw district-a Hayuliang constituency by-election hi boruak muanawm tak hnuaiah zawhfel a nih thu tarlan a ni. Venhimna khauh tak hnuaiah inthlan hi neih a ni a, zing dar sarih aṭangin mipuiten vote thlakin, boruak ṭha tak hnuaiah zawhfel a nih thu Deputy Chief Electoral Officer D J Bhattacharjee chuan a sawi. Hmun kilkhawr zawka Polling booth ṭhen-
khat aṭanga report an la dawn kim loh avangin, vote tla zat hi a la danglam theih thu Bhattacharjee chhuan a sawi bawk.

North East Democratic Alliance (NEDA) candidate Dasanglu Pul chu BJP ticket-in a ding a, a ni bakah hian Independent candidate Yompi Kri leh Konteso Kri-te an awm. Hayuliang by-election-ah hian district electoral officer, returning officer leh general observer-te chu hmeichhia vek an nih thu Election Commission chuan a tarlang, hetiang hi AP bikah a thlen ṭum khatna a ni. By-eletion-ah hian Electronic Voting Machines (EVMs) 81 hman a ni.

Assam-ah chuan Lakhimpur Lok Sabha constituency leh Baithalangso legislative assembly constituency-ah te inthlan hi neih a ni a, vote nei mi maktaduai 1.7 an awm a, vote 60% a tla. Chief Electoral Office tarlan danin constituency pahnihah hian boruak duhawm lo thleng awm loin zawhfel a ni. Lakhimpur Lok Sabha constituency hnuaiah Naoboicha assembly-ah vote tla ṭha berin 68.37% a tling a, Dhakuakhana assembly (56%) chu a hniam ber thung. Lakhimpur Lok Sabha constituency-ah hian candidate panga awmin, Baithalangso legislative assembly constituency-ah candidate pathum an awm thung.

Bharatiya Janata Party (BJP) chuan Lakhimpur Lok Sabha seat chuh tur hian an party MLA Pradan Baruah an thehchhuak a, Congress-in an party senior member Hema Hari Pegu an thehchhuak ve bawk. CPI tan Amiya Kumar Handique a ding a, Hem Kanta Miri chu SUCI candidate niin, a ni bakah hian Independent candidate Dilip Moran a awm bawk. Baithalangso constituency-ah hian candidate pathum Mansing Rongpi (BJP), Rupon Sing Ronghang (Cingress) leh Rajen Timung (Independent) te an awm a ni.

Tripura-ah pawh assembly constituency pahnih ah by-election hi neih a ni a, vote tlak ṭhatna ber niin, 90% a tling phak. Additional chief electoral officer Debashish Modak chuan vote a tlak ṭhat thu sawiin, mipuiten boruak muanawm tak hnuiah vote an thlak thu a sawi. Hetih lai hian Khowai assembly constituency-a Singichara polling booth-ah puak thei thil awmna bag hmuh a ni a, Security force leh Bomb disposal squad-te'n an enfiah hnuah, a pangngaia vote thlak chhunzawm a nih thu Modak chuan a sawi.

Barjala leh Khowai assembly constituency-ah te hian hian central paramilitary force, Border Security Force leh Central Reserve Police Force-te chuan venhim hna an thawk tih Director General Police K. Nagaraj chuan a sawi.

Constituency pahnihah hian candidate panga ve ve awmin, Barjala bialah hian vote nei mi 39,007 an awm a, Khowai-ah pawh vote nei hi mi 39,400 an awm. Communist Party of India-Marxist (CPI-M), Trinamool Congress, Bharatiya Janata Party leh Congress party te chu hnehna chan tumin an inkhing a ni. Vote tla te hi November 22-ah chhiar a ni ang.