Meghalaya Chief Minister Mukul Sangma

Meghalaya Chief Minister 11-na Dr. Mukul M. Sangma hi South West Garo Hills district-a thingtlang khua Chengkompara-ah, April 20 1965 khan Binoy Bhushan M Marak leh Roshana Begum-te inkarah a piang. Dikkanchi D. Shira nen inneiin fa pali an nei.

Zirna lam

Meghalaya CM Dr. Sangma hi Government High School, Ampati-ah hun rei tak chhung a kal a, hemi hnu hian Science subject lain St. Anthony's College, Shillong-ah kum eng emaw zat a zir leh. Tichuan kum 1984 khan Regional Institute of Medical Sciences (RIMS), Imphal aṭangin medicine-ah a graduate. RIMS-a a kal chhung hian Students Council-ah nihna pawimawh tak tak a chelh ṭhin. Kum 1991 khan Zikzak Public Health Centre-ah medical and health officer-in a lut zui a ni.

Political career

Dr. Sangma hian kum 1993 khan politics a luhchilh ṭan a, Indian National Congress member a ni. Meghalaya Legislative Assembly election-ah Independent-in a ding a, Ampatigiri constituency aṭanga thlan tlin a ni. Hemi hnu hian dinhmun pawimawh luahchho zui nghalin, Meghalaya Transport Corporation-ah chairman a ni. Kum 1998 khan Ampatigiri constituency aṭang hian a ṭum hnih nan thlan tlin leh a ni a, kum 2003 leh 2008-ah khan he bial aṭang vek hian Indian National Congress ticket-in hneh taka thlan tlin a ni leh bawk.

Chief Minister hlui D. D. Lapang kaihhruai sorkarah dinhmun pawimawh luah chhoin, kum 2003 khan home leh education minister atan lakluh a ni. April 11, 2005 khan Meghalaya deputy chief minister atan lakluh a ni a, mahse hemi kum vek October 7-ah a nihna aṭangin a bang. Kum 2005 September 30 khan, state-level committee-in Meghalaya Board of Secondary Education (MBOSE) siamṭhat a tum duh lohna lantirin lungawilohna lantir a ni a, state police leh Central Reserve Police Force-te chuan mipui hnawhdarh nan silai an hmetpuak. He thil thlengah hian East Garo Hills district-a Williamnagar-ah chuan mi panga kahhlum an ni a, West Garo Hills district-a Tura-ah mi pali an thih bakah, mi 100 chuangin hliam an tuar. He thil thleng avang hian Sangma chu deputy chief minister a nihna aṭangin a bang a ni.

Indian National Congress leh Meghalaya United Alliance (MUA) ṭangkawp sorkarah, kha tih hun laia chief minister D. D. Lapang chuan, kum 2009, May 13 khan deputy chief minister atan a ruat nawn leh. D. D. Lapang hi kum 2010 April thla khan chief minister a nihna aṭangin a bang a, Dr. Sangma hian April 20 2010 aṭang khan lal ṭhuthleng a luah zui ta a ni.

Meghalaya CM Dr. Mukul Sangma hi Ampatigiri constituency-a a din tawh chinah hnehna ala chang vek a, Ampatigiri hi a bial mek a ni.