Assam-a inlambunna thlengah sipai pathum an thi

Assam-ah kar kalta Inrinni khan inlambunna thlengin, sipai pathum an thi a, midang pali-in hliam an tuar.

United Liberation Front of Assam (ULFA) hel chu inlambunna thlengah hian mawhphurtua ngaih an ni a, Tinsukia district-a Pengeri area-ah sipai te hi an lo bei a ni. Defence PRO Lt. Suneet Col Newton chuan helte hian kawng dungah bomb an kam tih sawiin, a puah hnu hian sipaite hi an kap zui nghal a, sipaite chuan kap let ve nghalin hun eng emaw chan an inkah hnuah helte hi an insaseng a ni, a ti. He thil thlengah hian mi pali-in hliam an tuar a, pakhat chu hospital-ah dahluh a ni.

Union Home Minister Rajnath Singh chuan inlambunna a thleng leh ta chu pawi a tih thu sawiin, hemi chungchangah hian Assam Chief minister Sarbananda Sonowal a biak tawh thu a sawi. Rajnath Singh chuan he thil thleng hi Ministry of Home Affairs (MHA) chuan a ngai thutak hle tih sawiin, thil awmdan a ngaichang reng tih Assam CM a hrilh. Sipai thi chhungte a tawrhpui thu sawiin, hliam te pawh dam leh thuai tura a duhsak thu Uninion minister hian a sawi.

Defence official chuan he thil hi zing lam dar 5.30 vela thleng niin a tarlang. Assam CM Sarbananda Sonowal chuan thi chhungte leh hliam tuarte a tawrhpui thu sawii, pawikhawihtute chu na taka chhan let an nih tur thu a sawi bawk.

Hetih lai hian Manipur-ah Pathianni zing khan Imphal West district-a Chingamathak area-ah bomb chak tak a puak a, mi pakhatin nunna a chan. Bomb puahna hmun hi Assam Rifles camp aṭanga hla lo te nia tarlan a ni. Police thuchhuah chuan, he thil thleng hi hel pawlte thil tih a nih an rin thu leh chhui chian mek a nih thu an tarlang.