Bameng Tago hian amah ngeiin A visa dilna a cancel : China

China chuan Indian badminton team manager, Bamang Tago-a visa dilna hnawlsak anga tarlan chungchangah, kar kalta Zirtawpni khan thuchhuah siamin, Beijing chuan Tago hian visa a dilna chu amahin a cancel zawk niin a tarlang.

Indian badminton team manager atana ruat Bamang Tago hi Arunachal Pradesh mi leh sa a ni a, Fuzhou-a khelh mek China Super Series Premier badminton tournament-ah India team hruai tura thlan a ni. Mahse Tago hian visa a hmuh ve theih loh avangin China a pan ve lo. Hemi chungchangah hian media-te chuan Tago chu Aruanchal mi a nih vangin, New Delhi-a Chinese Embassy chuan China sorkar hriatpuina lo chuan visa an pe thei lo niin an tarlang. Arunachal Pradesh Badminton Association Secretary hian visa a dil ngei a, hnawlsak a nih thu hi amah ngei pawhin a lo sawi chhuak tawh a ni.

Chinese Foreign Ministry thupuangtu Geng Shuang chuan, Tago-a'n visa a dil chungchangah media-te chuan thudik lo an thehdarh niin a sawi a, Tago hian amah ngeiin a visa dilna a cancel zawk a ni, a ti. Geng chuan, he thil thleng hi kan chhui chiang tawh a, Tago-a hian Chinese embassy-ah visa a dil ngei a, a dilna chu hnawlsak a ni lo tih a sawi. He thil hi China chuan a ngai thutak hle tih sawiin, ram pahnihte inkar a chhiat loh thu leh, inṭhian ṭhatna a awm zel a beisei thu a sawi bawk.

Hetih lai hian Taga-a visa dilna chu Arunachal Pradesh mi a nih avanga hnawl a nih thu tarlan a ni. Ministry of External Affairs thupuangtu Vikas Swarup chuan, Indian passport neite chu ang khat vek an nih thu sawiin, Chinese Embassy chet dan chu an dem thu leh tun hnuah thleng tawh lo se an duh thu a sawi. Tago hian Chinese Embassy-in Arunachal Pradesh mi a nih thu a hriat hnuah, Beijing pawmpuina tel lo chuan visa an pek chhuah thei loh thu an hrilh niin sorkar laipuiah a lo thlen tawh a ni.

Indian Badminton Team manager Bamang Tago chuan China-in visa a dilna amah ngeiin a cancel leh anga a sawi chu thudik lo a nih thu a sawi a, a passport pawh Chinese Embassy-an an la hrensak thu a sawi. "Chinese Ambassador chu November 17 khan lehkha ka thawn a, visa min pe chhuak thuai turin ka ngen a, cancel turin ka ngen lo" a ti.