Ni 14 dang APSC chairman hreng leh dawn

Assam Pradesh Service Commission (APSC) chairman Rakesh Paul chu special court chuan ni 14 dang judicial custody-a awm leh rih turin thupek a chhuah.

APSC chairman Paul hi November 4 khan thamna sum lak thubuaiah man a ni a, court chuan ni 14 chhung judicial custody-ah da hrih turin thupek a chhuah a, hei hi kar kalta Zirtawpni khan a zo a ni. Mahse special court chuan Paul hi December 3 thleng judicial custody-ah dah leh rih turin thupek a chhuah leh ta a ni. Special Judge A. Bhattacharya chuan, Paul hi enkawlna mumal tak pe turin a hriattir a, a khat tawka mediacal check-up ti tur te, ei tur leh riahna tur mumal tak pek turin a ti a ni.

Hetih lai hian Paul-a ukil, Angshuman Bora chuan Paul hian hnu chhui chak zawka kalpui a nih theih nan police-te thawhpui a hreh lo a, bail dilna pawh court-ah thehluh a ni lo, a ti. Paul bakah hian APSC member Samedur Rahman leh Assistant Controller of Examinations Pabitra Kaibarta te chu thamna sum lak thubuaiah hian man an lo ni tawh bawk. Police-te chuan Samedur Rahman chenna-in aṭangin pawisa fai cheng nuai 9.5 leh document pawimawh eng emaw zat an man tawh tih an tarlang. Court chuan pawisa fai man te hi state treasury-ah dah turin a hriattir tawh bawk.

APSC hnuaia hnalak thubuai chhuina kal zelah hian APSC member bakah sorkar mi pawimawh eng emaw zat an inhnamhnawih an awm nia tarlan a ni. Mawhphurtu bera ngaih APSC chairman Rakesh Paul-a suspend a nih theih nan state cabinet meeting chuan Governor Banwarilal Purohit hnenah rawtna a thlen tawh a ni.