Dhaka-ah India leh Bangladesh aiawhte inbia

India leh Bangladesh official-te chuan kar kalta khan Bangladesh khaw-pui Dhaka-ah ramri chung-changa inbiakna an nei.

Ram pahnih aiawhte hian Tripura chhim lama Muhurichar ramri chung-chang an sawiho a ni. Tripura Revenue Department offi-cial chuan, meeting-ah hian Muhurichar ramri chungchang ngaihtuahah ram pahnih official-te chuan report an siam ang a, chu chu an ram sorkar-ah an thehlut leh ve ve dawn a, thutlukna siam nghal theih a ni lo, a ti. Indian official-te chuan Indira-Mujib accord aṭanga a lan dan chuan, ramri chuan Muhuri ram lai tak a paltlang niin Bangladesh palai an hrilh. Hei hi Bangladesh official-te chuan pawm loin, kumtin lui luangin a kuang a zauh bakah a luan dan a thlak fo a, kum tam a vei tawh avangin India ṭanfung chu a dik lo a ni, an ti ve thung. Indira-Mujib agreement hi March 19, 1972 khan India Prime Minister Indira Gandhi leh Bangladesh Prime Minister Sheikh Mujibur Rahman-te chuan an lo ziak tawh a ni.

India aiawha tel te hi External Affairs Ministry-a Joint Secretary Sripriya Ranganathan-i'n a ho a, Bangladesh aiawh member 12 te chu Home Ministry-a Additional Secretary (Poli-tical) Abu Hena Mohammad Rahamatul Muneem-a'n a ho ve bawk.

Kar kalta Ningani khan ram pahnih official-te hian Muhurichar hi an tlawh a, ramri chinfel a nih hnuah daidanna fel tak siam an rawt a ni. Kum 2015 khan India-Bangladesh Joint Boundary Working Group meeting chu Dhaka-ah hian neih a lo ni tawh a, ram pahnih aiawhte chuan joint survey neih an lo remti tawh a ni. Bangladesh palai Ranganathan hian Muhurichar chungchangah hian Tripura Chief Minister Manik Sarkar chu meeting a neihpui bawk.