Assam CM-in Indo-Myanmar-Thailand Car Rally vailiam

Assam Chief Minister Sarbananda Sonowal chuan kar kalta Inrinni khan Guwahati-ah 'Indo-Myanmar-Thailand Friendship Motor Rally' a vai liam a, hei hi ṭhenawm ramte nena inṭhianṭhatna leh, insumdawn tawnna kawnga a bulṭanna a nih thu a sawi.

Assam CM Sonowal chuan, trilateral highway India-Myanmar-Thailand inkalpawhna tur kawngpui siam a nih tur thu sawiin, chu chuan nasa takin hmarchhak tan hmasawnna a thlen a beisei tih a sawi. Car rally buatsaih chu sorkar laipui policy pakhat 'Act East policy' hnuaia hmalakna a nih thu sawiin, hei hian hmarchhak state leh
ṭhenawm ram te inkarah inunauna leh inṭhianṭhatna a thlen ngei beisei a ni, a ti. Thenawm ram te nen kawng hrang hrangah inzawmna ṭha zawk neih a pawimawh thu sawiin, car rally buatsaih a ni chu lawmawm a tih thu Assam Chief Minister chuan a sawi bawk.

Rally-ah hian mi 80 vel an tel a, Indo-Myanmar-Thailand (IMT) Trilateral Highway siam tur km 5,722-a thui chu ni 19 chhungin an tlan dawn a ni. India siam car 20 vel an tel a, India aṭangin Thailand an pan ang a, heta ṭang hian Myanmar an lut leh dawn a ni.